*అధికారం కోసం అడ్డగోలు హామీలిచ్చి...పదవిదక్కాక రైతుల్ని.. సాగును నిండా ముంచిన ఘనుడు జగన్ : ప్రత్తిపాటి*
పల్నాడు జిల్లా గణపవరం అక్షర విజేత
• 2019 ఎన్నికలకు ముందు రైతులకిచ్చిన హామీల్లో ఒక్కటీ అమలు చేయని రైతు ద్రోహి జగన్ : ప్రత్తిపాటి
• ఏటా రూ.13,500 రైతు భరోసా సాయం.. రూ.3వేలకోట్ల ధరల స్థిరీకరణ నిధి, రూ.4 వేల కోట్ల విపత్తుల సాయం.. సాగునీటి ప్రాజెక్టుల నిర్మాణాన్ని ప్యాలెస్ లో భద్రపరిచింది జగన్ కాదా? ప్రత్తిపాటి
వ్యవసాయాధారిత దేశంలో ఏ రాజకీయ నాయకుడు చేయనంత అన్యాయం, ద్రోహం, మోసం జగన్ రాష్ట్ర రైతాంగానికి, వ్యవసాయానికి చేశాడని, 2019 ఎన్నికలకు ముందు అధికార కాంక్షతో అన్నదాతలకు అడ్డగోలుగా హామీలిచ్చి, ముఖ్యమంత్రి అయ్యాక వారిని నిండా ముంచిన రైతుద్రోహి జగన్ అని మాజీ మంత్రి, శాసనసభ్యులు ప్రత్తిపాటి పుల్లారావు తెలిపారు. బుధవారం రాత్రి నాదెండ్ల మండలం గణపవరంలో నిర్వహించిన రైతన్నా మీకోసం కార్యక్రమంలో పాల్గొన్న ఆయన.. గ్రామలోని రైతుల ఇళ్లకు వెళ్లి మాట్లాడారు. ప్రభుత్వం ఆచరణలో పెట్టాలనుకుంటున్న పంచసూత్రాల ప్రాముఖ్యతను వివరించి, ఏం పంటలు వేశారు..ఎలా ఉన్నాయని అడిగి తెలుసుకున్నారు. అనంతరం గ్రామంలోని జిల్లా పరిషత్ హైస్కూల్ ప్రహరీ చుట్టూ రూ.10లక్షలతో నిర్మించే డ్రైనేజ్ నిర్మాణ పనులకు శంకుస్థాపన చేసి, గ్రామస్తుల్ని ఉద్దేశించి మాట్లాడారు.
*ధరల స్థిరీకరణ, విపత్తుల నిధితో రైతుల్ని ఆదుకుంటానన్న జగన్ .. చివరకు తన నిధిని మాత్రం బాగా పెంచుకున్నాడు.*
ఐదేళ్లపాటు రైతుల్ని, వ్యవసాయాన్ని పూర్తిగా విస్మరించి, న్యాయం చేయమని అడిగిన రైతుల్ని ఇష్టానుసారం దూషించి, కేసులు పెట్టించిన వైసీపీనేతలు.. జగన్, నేడు రైతులకు అన్యాయం జరుగుతుందని మొసలికన్నీరు కారుస్తున్నాడని ప్రత్తిపాటి ఆగ్రహం వ్యక్తంచేశారు. అధికారం కోసం రైతుల్ని పావులుగా వాడుకొని, చివరకు ముఖ్యమంత్రి అయ్యాక వారిని మోసగించిన ఏకైక నాయకుడిగా జగన్ చరిత్రలో నిలిచిపోతాడన్నారు. రైతుభరోసా కింద ఏటా ప్రతిరైతుకు రూ.13,500 ఆర్థిక సాయం అందిస్తానన్న జగన్ చివరకు అరకొరగా, కొందరు రైతులకే రూ.7,500లు ఇచ్చింది జగన్ కాదా అని ప్రత్తిపాటి ప్రశ్నించారు. రూ.3 వేల కోట్ల ధరల స్థిరీకరణ నిధి, రూ.4 వేలకోట్ల ప్రకృతి విపత్తుల నిధి ఏర్పాటు చేస్తానని చివరకు తన నిధిని మాత్రం జగన్ బాగా పెంచుకున్నాడన్నారు. రైతులకు ఏర్పాటు చేస్తానన్న నిధులు ఏ ప్యాలెస్ లో దాచాడో జగన్ ఇప్పటికైనా చెప్పాలన్నారు. చంద్రబాబు ప్రవేశపెట్టిన ఎన్టీఆర్ జలసిరి పథకాన్ని తలదన్నేలా వైఎస్సార్ జలకళ పథకం ద్వారా నీళ్లు లేని ప్రతి రైతు పొలంలో ఉచితంగా బోర్లు వేయిస్తానన్న జగన్ చివరకు పంటకాలువల్ని కూడా పిచ్చిమొక్కలతో నింపాడన్నారు. కమీషన్ల కక్కుర్తితో పోలవరం సహా కీలక సాగునీటి ప్రాజెక్టుల్ని పడుకోబెట్టిన ఘనుడు జగన్ అని ప్రత్తిపాటి చెప్పారు. రైతులు ఉచితంగా తమ ఉత్పత్తులు నిల్వచేసుకోవడానికి, నియోజకవర్గానికో శీతలగిడ్డంగిని నిర్మిస్తానన్న జగన్ హామీ ఏమైందో రైతులే ఆలోచించాలన్నారు. మెడికల్ కాలేజీల్లానే శీతల గిడ్డంగులు కూడా కాగితాలపైనే పూర్తయ్యాయని ప్రత్తిపాటి ఎద్దేవాచేశారు. చనిపోయిన ప్రతి రైతు కుటుంబానికి రూ.7లక్షల బీమాసాయం అందిస్తానన్న జగన్.. చివరకు తమకు న్యాయం చేయమని కోరిన రైతులపై అక్రమ కేసులు పెట్టించి జైళ్లపాలు చేశాడన్నారు. ఈ విధంగా చెప్పుకుంటూ పోతే.. జగన్ రైతులకు చేసిన మోసాల జాబితా కొండవీటి చాంతాడునే మించిపోతుందని ప్రత్తిపాటి తెలిపారు. ఈ కార్యక్రమంలో టిడిపి సమన్వయకర్త నెల్లూరి సదాశివరావు, మార్కెట్ యార్డ్ చైర్మన్ షేక్ టీడీపీ కరీముల్లా, మున్సిపల్ చైర్మన్ షేక్ రఫాని, మండల అధ్యక్షులు జవ్వాజి మధన్ మోహన్, రాష్ట్ర డైరెక్టర్ కందుల రమణ, మున్సిపల్ ఫ్లోర్ లీడర్ గంగా శ్రీనివాసరావు, సొసైటీ చైర్మన్ పెంట్యాల శేషయ్య, టీడీపీ నాయకులు కెల్లంపల్లి ఆచయ్య, వలేటి హిమవంతరావు, మార్కెట్ యార్డ్ వైస్ చైర్మన్ పిల్లి కోటేశ్వరరావు, కూటమి నాయకులు, అధికారులు తదితరులు పాల్గొన్నారు.
