*అనుసంధాన రోడ్డుకు 9.54 లక్షల నిధులు మంజూరు చేసిన ప్రభుత్వ విప్..* -- నిర్మాణాన పనులు ప్రారంభించడంతో 4 గ్రామాల ప్రజల హర్షం...
*అక్షర విజేత, చందుర్తి :*
చందుర్తి మండలంలోని ఆశిరెడ్డిపల్లె - రామన్నపేట గ్రామాల మధ్య అనుసంధాన రోడ్డు నిర్మాణానికి నిధులు మంజూరు కావడంతో ఎమ్మెల్యే ఆది శ్రీనివాస్ సూచన మేరకు రుద్రంగి మార్కెట్ కమిటీ వైస్ చైర్మన్ బొజ్జ మల్లేశం స్థానిక నాయకులతో కలిసి సోమవారం గ్రావెల్ పనులను ప్రారంభించారు. ఈ సందర్భంగా ఆయన మాట్లాడుతూ గత పది సంవత్సరాలుగా ఆశిరెడ్డిపల్లి - రామన్నపేట గ్రామాల మధ్య అనుసంధాన రోడ్డు భారీ వర్షాల కారణంగా పూర్తి అధ్వానంగా మారి ప్రయాణికులకు తీవ్ర ఇబ్బంది కలిగిందని, గత బిఆర్ఎస్ ప్రభుత్వ హయాంలో ఎన్ని సార్లు మొరపెట్టుకున్నా పట్టించుకోలేదని అన్నారు. కాంగ్రెస్ ప్రభుత్వం అధికారంలోకి రాగానే ప్రభుత్వ విప్, వేములవాడ శాసనసభ్యులు ఆది శ్రీనివాస్ దృష్టికి తీసుకెళ్లగా అట్టి రోడ్డు నిర్మాణం కోసం గ్రావెల్ పోయడానికి 9 లక్షల 54 వేల పై చిలుకు నిధులను ఎన్ఆర్ఈజీఎస్ ద్వారా మంజూరు చేయించడం జరిగిందని అన్నారు. అలాగే వర్షానికి తెగిపోయిన మత్తడి పై మినీ బ్రిడ్జి నిర్మాణం కోసం ప్రణాళిక సిద్ధం చేయాలని ప్రభుత్వ విప్ అధికారులకు ఆదేశాలు జారీ చేసినట్లు తెలిపారు. త్వరలోనే బ్రిడ్జి నిర్మాణం పూర్తి చేస్తామని అన్నారు. ఇట్టి నిధులు మంజూరు చేయించి ఏళ్లనాటి ఇబ్బందిని తీర్చిన స్థానిక ఎమ్మెల్యే ఆది శ్రీనివాస్ కి కాంగ్రెస్ పార్టీ నాయకులు గ్రామస్తుల పక్షాన కృతజ్ఞతలు తెలియజేశారు. ఈ కార్యక్రమంలో పంచాయతీ కార్యదర్శి మహేష్, మాజీ సింగిల్విండో చైర్మన్ అంచ రాంరెడ్డి, గ్రామ శాఖ అధ్యక్షుడు బొజ్జ దేవయ్య, ఫీల్డ్ అసిస్టెంట్ మధు, నాయకులు కలిపాక బాపురెడ్డి, నందెళ్ల భూమరాజు, ఊరడి గణేష్, ఉపాధి హామీ కూలీలు తదితరులు పాల్గొన్నారు.
