దైవ ప్రసాదంపై అభ్యంతరకర వ్యాఖ్యలు* – *యాంకర్ శివజ్యోతిపై భగ్గుమన్న భక్తులు* – *జీవితకాల నిషేధం విధించాలని డిమాండ్
*దైవ ప్రసాదంపై అభ్యంతరకర వ్యాఖ్యలు*
– *యాంకర్ శివజ్యోతిపై భగ్గుమన్న భక్తులు*
– *జీవితకాల నిషేధం విధించాలని డిమాండ్!*
అక్షరవిజేత, ఎడిటర్ డా.బి,అనిల్ కుమార్ తిరుమల/హైదరాబాద్:
తిరుమల శ్రీవారి భక్తుల మనోభావాలను దెబ్బతీసే విధంగా యాంకర్ శివజ్యోతి చేసిన వ్యాఖ్యలు రాష్ట్రవ్యాప్తంగా తీవ్ర చర్చనీయాంశమయ్యాయి. సాక్షాత్తు కలియుగ ప్రత్యక్ష దైవం శ్రీ వెంకటేశ్వర స్వామివారి దివ్య ప్రసాదం గురించి ఆమె వాడిన పదజాలంపై భక్తులు, హిందూ సంఘాలు తీవ్ర ఆగ్రహం వ్యక్తం చేస్తున్నాయి. శివజ్యోతిపై టీటీడీ (తిరుమల తిరుపతి దేవస్థానం) కఠిన చర్యలు తీసుకోవాలని, ఆమెను జీవితకాలం తిరుమల కొండపైకి రాకుండా నిషేధించాలని డిమాండ్లు వెల్లువెత్తుతున్నాయి.
*వివాదానికి కారణమైన వ్యాఖ్యలు*
శివజ్యోతి తిరుమల శ్రీవారి దర్శనానికి వెళ్లినప్పుడు, క్యూ లైన్‌లో టీటీడీ పంపిణీ చేసిన అన్నప్రసాదాన్ని స్వీకరిస్తూ ఒక వీడియో చిత్రీకరించారు. ఈ వీడియోలో ఆమె, "మేము ఇక్కడ అత్యంత కాస్ట్లీ ప్రసాదం అడుక్కుంటున్నాం... ప్రపంచంలోనే 'రిచెస్ట్ బిచ్చగాళ్లం' మేమే" అంటూ నవ్వుతూ వ్యాఖ్యానించారు.శ్రీవారి ప్రసాదాన్ని భక్తులు మహాద్భుతమైన దైవానుగ్రహంగా, పవిత్రమైన పుణ్య ఫలంగా భావిస్తారు. అలాంటి పవిత్రమైన ప్రసాదాన్ని "అడుక్కుంటున్నాం", భక్తులను "రిచెస్ట్ బిచ్చగాళ్లు" అంటూ పోల్చడంపై భక్తుల మనోభావాలు తీవ్రంగా దెబ్బతిన్నాయి. ఈ వ్యాఖ్యలు సామాజిక మాధ్యమాలలో వైరల్ అవ్వడంతో వివాదం మొదలైంది.
*భక్తులు, సంఘాల తీవ్ర ఖండన...దైవ ప్రసాదం అంటే భిక్ష కాదు:*
ఈ వ్యాఖ్యలపై హిందూ ధర్మ పరిరక్షణ వేదికలు, పలు భక్త బృందాలు తీవ్రంగా స్పందించాయి. "కోట్లాది మంది భక్తులు దైవ ప్రసాదాన్ని భక్తితో స్వీకరిస్తారు. అది భిక్ష కాదు. స్వామివారి పట్ల ఉన్న అపారమైన ప్రేమను, విశ్వాసాన్ని ఆ పదాలు కించపరిచాయి," అని వారు ఆగ్రహం వ్యక్తం చేశారు.
*క్షమాపణ సరిపోదు, చర్యలు కావాలి:*
కేవలం క్షమాపణ చెప్పడంతో ఈ వివాదం ముగియదని, ఆమె చేసిన వ్యాఖ్యలు శ్రీవారిని, భక్తుల విశ్వాసాన్ని అవమానించాయని, కాబట్టి టీటీడీ అధికారులు దీనిని సీరియస్‌గా పరిగణించాలని భక్తులు డిమాండ్ చేస్తున్నారు.
*జీవితకాల నిషేధం డిమాండ్:*
ఈ వ్యవహారంపై పలు హిందూ సంఘాల ప్రతినిధులు స్పందిస్తూ, దేవాలయాల పవిత్రతను, భక్తుల విశ్వాసాన్ని దెబ్బతీసే విధంగా మాట్లాడిన శివజ్యోతిపై కఠిన చర్యలు తీసుకోవాలని కోరుతున్నారు."తమ పాపులారిటీ కోసం దేవుడిని, ప్రసాదాన్ని వాడుకోవడం సరికాదు. ఆలయ నిబంధనలను ఉల్లంఘిస్తూ వీడియోలు తీయడం, అభ్యంతరకర వ్యాఖ్యలు చేయడం క్షమించరానిది. ఇలాంటి వారిని జీవితకాలం తిరుమల కొండకు రాకుండా నిషేధించాలని టీటీడీ చైర్మన్‌ను, ఈవోను డిమాండ్ చేస్తున్నాం," అని పలువురు ప్రతినిధులు మీడియాకు తెలిపారు.
*శివజ్యోతి వివరణ, క్షమాపణ:*
భక్తులు, నెటిజన్ల నుంచి విపరీతమైన వ్యతిరేకత రావడంతో, శివజ్యోతి తాజాగా ఒక వీడియోను విడుదల చేసి క్షమాపణలు చెప్పారు. "నా మాటల ఉద్దేశ్యం ఎవరినీ నొప్పించడం కాదు. తెలియక ఆ మాటలు అన్నాను. శ్రీవారి భక్తులకు, హిందూ ధర్మానికి నా వల్ల బాధ కలిగి ఉంటే మన్నించాలి. నా వ్యాఖ్యలు తప్పే. మళ్లీ ఇలా జరగదు," అని ఆమె విచారం వ్యక్తం చేశారు.ఈ వివాదంపై టీటీడీ అధికారికంగా స్పందించి, ఎలాంటి నిర్ణయం తీసుకుంటుందో వేచి చూడాలి.
.jpg)
.png)
1.jpg)
.jpg)
.jpg)
