Vijetha Daily

ట్రంప్-మోదీ వ్యాపార రాజకీయాలు: భారత ఆర్థిక స్వాతంత్ర్యం ఎవరి చేతుల్లో?

Dr.B.Anil Kumar

08 August 2025 02:12 PM

Views : 287

Location : Editorial "ట్రంప్-మోదీ వ్యాపార రాజకీయాలు: భారత ఆర్థిక స్వాతంత్ర్యం ఎవరి చేతుల్లో?" ------------ అమెరికా మాజీ అధ్యక్షుడు డోనాల్డ్ ట్రంప్ భారతదేశంపై విధించిన టారిఫ్ పెంపులు, రష్యాతో వ్యాపార సంబంధాలను ఛేదించమన్న డిమాండ్లు కేవలం ఆర్థిక విధానాలే కాదు, భారత సార్వభౌమత్వంపై సవాల్లు. ట్రంప్ ప్రభుత్వం భారతీయ ఎగుమతులపై 50 శాతం సుంకాలు విధించి, రష్యాతో క్రూడ్ ఆయిల్ ఒప్పందాలను నిషేధించడానికి ప్రయత్నించిన సందర్భంలో, భారత ప్రభుత్వం యొక్క నిశ్శబ్దం ఆశ్చర్యాన్ని కలిగిస్తుంది. ప్రధానమంత్రి నరేంద్ర మోదీ ట్రంప్తో సన్నిహిత సంబంధాలు ప్రచారం చేసినా, ఆయన భారత ప్రయోజనాలను సమర్థవంతంగా పరిరక్షించలేకపోయారు. ఈ పరిస్థితి భారత ఆర్థిక విధానాలలోని దౌర్బల్యాన్ని, అమెరికాపై ఉన్న అతిగా ఆధారపడటాన్ని బహిర్గతం చేస్తుంది. రష్యా-భారత సంబంధాలు: ఒక చారిత్రక అవసరం: ---------- రష్యా భారతదేశానికి కేవలం వాణిజ్య భాగస్వామి మాత్రమే కాదు, సామరస్యపూర్వకమైన జియోపాలిటికల్ మిత్రుడు. 1971లో బాంగ్లాదేశ్ యుద్ధంలో రష్యా భారతానికి అండగా నిలిచింది. కాశ్మీర్ విషయంలో ఐక్యరాజ్యసమితిలో మద్దతు ఇచ్చింది. ఇప్పటికీ భారత రక్షణ వ్యవస్థలో 60 శాతం సైనిక సామగ్రి రష్యాదే. ఉక్రెయిన్ యుద్ధంలో రష్యాపై పాశ్చాత్య దేశాలు ఆర్థిక ఆంక్షలు, పరిహారాలు విధించినప్పటికీ, భారతదేశం తన జాతీయ ప్రయోజనాలను ప్రాధాన్యతనిచ్చి రష్యాతో క్రూడ్ ఆయిల్ కొనుగోలు కొనసాగించింది. ఇది ట్రంప్ కు మింగుడు పడని విషయం.ట్రంప్ ప్రకారం, "భారత్ అమెరికా శత్రువులతో వ్యాపారం చేయకూడదు". కానీ, అమెరికా ఎప్పుడూ భారత ప్రయోజనాలను ప్రధానంగా పరిగణించలేదు. 1960లలో భారత్ లోని తేలికపాటి చమురు నిల్వలు లభించవు అని ప్రకటించింది. సోవియట్ యూనియన్ సహాయంతో బాంబే హైలో భారీ నిల్వలు కనుగొనబడ్డాయి. ఇది అమెరికా విశ్వసనీయతపై ప్రశ్నార్థకాలను ఎత్తుతుంది. ట్రంప్ వ్యాపార సామ్రాజ్యం - భారత ఆర్థిక వ్యవస్థను దోచే సాధనం: -------- ట్రంప్ భారత ఆర్థిక వ్యవస్థను "మృతప్రాయం"గా వర్ణించినా, అతని స్వంత సంస్థలు భారత్ లో అపార లాభాలు ఆర్జిస్తున్నాయి. ముంబై, హైదరాబాద్, బెంగళూరు, నోయిడాలలో ట్రంప్ ఓర్గనైజేషన్ 11 మిలియన్ చదరపు అడుగుల భవన నిర్మాణ ప్రాజెక్టుల్లో పెట్టుబడులు పెట్టింది. హైదరాబాద్లోని 63 అంతస్తుల ట్రంప్ టవర్ ద్వారా 3,500 కోట్ల రూపాయల లాభం ఆయన కంపెనీలకు వస్తుంది. ట్రంప్ చెప్పినట్లు భారత్ "మృతప్రాయ ఆర్థిక వ్యవస్థ" అయివుంటే ఈ లాభాలు ట్రంప్ కు ఏలా వచ్చేవి? ట్రంప్ భారత్ నుండి ఒకవైపు లాభాలు దండుకుంటూ, మరోవైపు అదే భారత దేశాన్ని ఆర్థికంగా బలహీనపరచడానికి ప్రయత్నిస్తున్నాడు. అతని డబల్ స్టాండర్డ్ స్పష్టంగా కనిపిస్తుంది: "మీ దేశం పేదది, కాబట్టి నేను మీపై పన్నులు విధిస్తాను. కానీ నా కంపెనీలు మీ భూమిలో కొనసాగాలి!" అనే ధోరణి ప్రమాదకరమైన పరిస్థితికి తార్కాణం. ఇంత జరుగుతున్నా ట్రంప్ పై మోదీ నిశ్శబ్దం: పిరికితనమా లేక వ్యాపార రాజకీయాలా?: --------------- ట్రంప్ భారత్ పై ఆర్థిక దాడులు చేస్తున్నప్పుడు, మోదీ ఎందుకు నిశ్శబ్దంగా ఉన్నాడు? అదానీ వ్యాపార సంస్థల గుట్టు అమెరికా ఫెడరేషన్ బ్యూరో ఆఫ్ ఇన్వెస్టిగేషన్ చేతికి చిక్కటం వల్ల దానిని అరెస్టు చేస్తామని మోదీని భయపెట్టడం, బ్లాక్ మేయిలింగ్ చేయటం కారణం కావచ్చు అనే అభిప్రాయం సర్వత్రా వ్యాపించింది. అలాగే 1. భారత్ అమెరికాపై ఆధారపడటం: భారత రక్షణ వ్యవస్థలో అమెరికా సామగ్రి, టెక్నాలజీకి ఎక్కువ ప్రాధాన్యత ఇవ్వడం. 2.ట్రంప్ వ్యాపారాలకు మద్దతు: మోదీ ప్రభుత్వం ట్రంప్ సంస్థలకు భారత్ లో వ్యాపార విస్తరణకు అనుకూల వాతావరణం కల్పించింది. ఇది రాజకీయ-వ్యాపార ఒప్పందంగా కనిపిస్తుంది. చివరిగా... భారత దేశం స్వదేశీ ఉత్పత్తుల పైన, బహుళ ధృవ ప్రపంచ వైఖరి పైనా దృష్టి పెట్టటం అత్యంత కీలకమైన అవసరం . ట్రంప్ వ్యవహారాలు భారతదేశానికి ఒక ముఖ్యమైన పాఠం నేర్పాయి." అమెరికా ఎప్పుడూ తన ప్రయోజనాలకే ప్రాధాన్యత ఇస్తుంది". భారతదేశం తన ఆర్థిక, రక్షణ విధానాలలో బహుళధృవ వైఖరిని అనుసరించక తప్పదు. రష్యా, ఫ్రాన్స్, చైనా, ఇజ్రాయెల్ వంటి దేశాలతో సమతుల్యమైన సంబంధాలు పెంపొందించుకోవడమే సరైన మార్గం. అలాగే, విదేశీ పెట్టుబడులను నియంత్రించే నియమాలు కఠినంగా అమలు చేయాలి. ట్రంప్ లాంటి వ్యక్తులు భారత ఆర్థిక వ్యవస్థను దోచుకునే అవకాశాలను, పరిస్థితులను నియంత్రించాలి.భారత్ "స్వదేశీ విధానం" అనేది కేవలం నినాదం కాకుండా, ఆర్థిక స్వాతంత్ర్యానికి ఆయుధంగా మారాలి. భారత ప్రభుత్వం, ప్రజలు ధృఢ సంకల్పంతో స్వదేశీ ఉత్పత్తులను మాత్రమే కొనుగోలు చేయాలి. మన దేశంలో లభించని అరుదైన ఉత్పత్తులను, సైన్స్, టెక్నాలజీని మాత్రమే విదేశాలనుండి దిగుమతి చేసుకోవాలి. గొప్పతనం కోసం, ఆడంబరాల కోసం విదేశీ వస్తువుల దిగుమతిని అనుమతించ రాదు. ఎప్పుడైనా... విదేశీ వస్తు వ్యామోహం భారత్ కు ముప్పే అనే సోయి భారత ప్రభుత్వానికి, ప్రజలకు ఉండాలి.ఈ బలహీనతే భారతీయుల ను బానిసలుగా మార్చిన చారిత్రక సత్యాలను మర్చిపోకూడదు.