Vijetha Daily

చదువుల్లో సారం ఎంత ...?

Dr.B.Anil Kumar

16 November 2025 06:49 PM

Views : 93

Location : Story చదువుల్లో సారం ఎంత ...? అక్షర విజేత, నర్సాపూర్: నేటి ప్రస్తుత విద్యా విధానంలో విద్యార్థులు అభ్యసిస్తున్న చదువుల్లో సారం ఎంత? ఇదేం ప్రశ్న అని మాత్రం ఆశ్చర్య పోవాల్సిన పనిలేదు. ఆలోచించాల్సిన అవసరం ఎంతైనా ఉంది. నవంబర్ 17నఅంతర్జాతీయ విద్యార్థుల దినోత్సవం సందర్భంగా ``విజేత'' దినపత్రిక అందిస్తున్న ప్రత్యేక కథనం. మారుతున్న కాలానికి, టెక్నాలజీకి అనుగుణంగా విద్యా వ్యవస్థ అప్డేట్ అయి ఉపాధికి మార్గం చూపే విధంగా రూపుదిద్దుకోవడం అవసరమే కానీ ప్రస్తుత విద్యా వ్యవస్థ మొత్తం మర మనుషులను తయారు చేస్తుందనడం లో ఏమాత్రం సందేహం లేదు. ప్రస్తుత విద్యా వ్యవస్థ ఒక డాక్టర్ని, ఒక ఇంజనీర్ ని, ఒక లాయర్ ని తేలికగా తయారు చేస్తుంది. కానీ ఒక నైతిక విలువలు ఉన్న మనిషిగా మాత్రం తయారు చేయలేక పోతుంది అనేది నిర్వివాదాంశం. ఎల్ కె జి నుండి ఇంజనీరింగ్ వరకు ఫీజులు వసూలు చేస్తూ బలవంతంగా సబ్జెక్టులను విద్యార్థుల పైన రుద్దుతూ తమ సంస్థలో చదివితే విద్యార్థులకు ఉజ్వలమైన భవిష్యత్తు ఉంటుందని ప్రకటనలు గుప్పించుకోవడం విద్యాసంస్థలకు అలవాటైపోయింది. ఇక ఫస్ట్ క్లాసు ర్యాంకులు వస్తేనే ఉత్తమ భవిష్యత్తు ఉంటుందని విద్యార్థుల తల్లిదండ్రులు సైతం తమ పిల్లలపై వత్తిడితీసుకురావడంసర్వసాధారణమైంది. కానీ చదువుల్లో సారం ఎంత అసలు చదువు లక్షణం, లక్ష్యం ఏమిటి అనేది మాత్రం ఎవ్వరు గుర్తించలేని పరిస్థితిలో ప్రస్తుతం సమాజం ఉందనే చెప్పాలి. ప్రస్తుత విద్యా విధానంలో సబ్జెక్టులు బోధించడం తప్ప నైతిక విలువలు, సృజనాత్మకత తో కూడిన విద్య అందించాలనే శ్రద్ధ ఎవరికీ లేకపోవడం అత్యంత బాధాకరమైన విషయం. విద్య అనేది మనుషిలో ఉన్న పరిపూర్ణతను వెలికి తీయడమే అసలైన విద్య అని స్వామి వివేకానంద అభిప్రాయపడ్డారు. ఇది కేవలం పుస్తక పరిజ్ఞానం కాకుండా వ్యక్తిత్వం నిర్మాణం, నైతిక విలువలు, ఆత్మస్థైర్యం, సృజనాత్మకతతో కూడిన వ్యక్తిత్వం, భయం నుండి విముక్తి వంటి లక్షణాలను విద్య వ్యవస్థ పెంపొందించాలని ఆయన ఎప్పుడో చెప్పారు. ప్రస్తుత ఆధునిక విద్య వ్యవస్థ విద్యార్థులకు ఆత్మవిశ్వాసం మనిషిలో ఉన్న పరిపూర్ణతను వెలికితీయడంలోవిఫలమవుతుందని, నిజమైన విద్య ఓ వ్యక్తిని నైతిక విలువలు అనే పునాదుల మీద, తన కాళ్ళ మీద తాను నిలబడేలా చేయాలని అలాంటిది ప్రస్తుత విద్య వ్యవస్థ విఫలమవుతుందని స్వామి వివేకానంద ఆనాడే చెప్పారు. ఇప్పటికే చదువుల పేరిట, ఉపాధి పేరిట సొంత ఊళ్లను వదిలి నగరాలకు, పట్టణాలకు వలస బాట పట్టడంతో సమిష్టి కుటుంబాలు కాస్త వ్యష్టి కుటుంబాలుగా మారాయి. దీంతో కుటుంబ వ్యవస్థ పై విద్యార్థులకు ఏమాత్రం అవగాహన లేకుండా పోతుంది. ఉమ్మడి కుటుంబాలు అందులో ఉండే గౌరవ మర్యాదలు, సరదా సంతోషాలన్నీ సినిమాలకే పరిమితం అయ్యాయి. ఇప్పటికే ఎవరినైనా పలకరించాల్సి వస్తే మనవాళ్లు పరాయి వాళ్ళు చిన్న పెద్ద తేడా లేకుండా అందరూ అంకుల్స్ ఆంటీలే. మున్ముందు ఇలాగే కొనసాగితే పరిస్థితి ఏంటి అనేది ప్రతి ఒక్కరూ తమ వంతు బాధ్యతగా ఆలోచించాల్సిన అవసరం ఎంతైనా ఉంది. మారుతున్న కాలానికిఅనుగుణంగా విద్యను అభ్యసించడం తప్పు కాదు కానీ నైతిక విలువలకు తిలోదకాలు ఇవ్వడం మాత్రం సమాజానికి మంచిది కాదు. ఇప్పటికే ఉన్నత చదువులు చదివి ప్యాకేజీలు అంటూ విదేశాలలో, దూర ప్రాంతాల్లో ఉద్యోగాలు చేస్తూ తల్లిదండ్రులను వృద్ధాశ్రమాలలో చేర్పిస్తున్న సంఘటనలు ఎన్నో చూస్తున్నాం. ఇదే వ్యవస్థ ఇలాగే కొనసాగితే మున్ముందు మరిన్ని అనాధాశ్రమాలు పెరుగుతాయే తప్ప సమాజంలో మానవతా విలువలు మొత్తం నశిస్తాయి. ఇకనైనాప్రభుత్వాలు, విద్యాసంస్థలు, తల్లిదండ్రులు అందరు కూడా ఆలోచించి సమాజంలో నైతిక విలువలు, సంస్కారంతో కూడుకున్న విద్యకు ప్రాధాన్యత నిచ్చి పెద్దపీటవేస్తే మంచి సమాజాన్ని మనం చూడవచ్చు. ఆ దిశగా అందరూ ఆలోచించి ఆచరిస్తారని, అలాంటి సమాజం మున్ముందు రావడానికి ఇప్పటినుండే అందరూ కార్యోన్ముకులు అవుతారని ఆశిద్దాం.

Latest News

రోగం చిన్నది...వైద్యం పెద్దది

08 Oct 2025 14:30:32

బీసీ రిజర్వేషన్లు: చారిత్రక అన్యాయాల నుండి రాజ్యాంగ పరిష్కారాల వైపు.

27 Jul 2025 08:33:12

Post Comment

Latest News

Popular Posts